Izdanja

Desi se pjesma

RECI

Kad buden portila
na vijac prez konfina
kad tornat ne buden mogla ni otela
zome svetu reci i ono ca son od sebe skrila

reci da son bila ženska zrela
va duše velo dete, sedena i mehka
a trja od kamikana ken son se rodila

reci kako son milo

na tvojen ramene šamuljala

dok drugi so mi dušo mrvili
srce pod nogami drobili
reci da son zjutra ranega va mladoletak poletela
da me je sunce zobilo, kad je drugeh teplilo

reci kako so moji difeti bili tvoji konfeti

s pacijenco si kombati kako son se tiho, po tiho
va tvojen srce njezdila i va njin nošla svoj mir

reci da son se smejala kad son najviše patila
da son siromahi kapila
sunce i mesecino samo zote va macići pobirala

reci, semi zome reci
samo nemoj jedinemu reć
kako son i koliko

 radi te imela.

U modrini čipkaste pjene

MOJ DIH

Pitali so me, ca je zome Istra

Istra mi je mat, gruda tepla

kantunić za dušo trudno

i mesto kede son 

prvo besedo rekla

Akvarel života i Rikamani šenjoli

TEŠKO JE

Va škurine istini

deštin kojenat

grehi spovedat

teško je...

tića poslušat

kako na grone trilo

prez tebe

teško je...

vreme zliženo

va sedeno melodijo ogrnut

i delat se da ti je se sejno

teško je...

mesecino srebron inkolat

čelestin nebu darovat

kapljico medežiji

rikordi od neveri škapulat

teško je...

na bonace sna jutro docekat

po moru kativerji i laži bordižat

va konšumanen tele

zgnjetveno dušo lecit

teško je...