Moji versi
Pupa od kamika
Dvo bušića od materi je nabarla
žljuk mehke besedi od oca popila
s pupo od kamika po putićah
štrapacah i klancićah va škarpeticah tekla.
Stena vele s perikolon so pretile
kamik, kamik, kamo got si se obrnu samo kamik
beli, trt, cist presikorski, mehko srce je ime.
Na kamike rojena, na kamike zgojena
va moru se je za kamik držala
dok kontru vola ni zaplavala.
Na konfine od vrta, s pet busi kumpira
z dvemi perami radića, poli fragoli grojza
po gramace se je s pupo od kamika zabovljala.
Va kove je kljesar s kamiken batoško pravo
škrila, kamenice, tavela
brentilj i koloni so znale kako je vela njegova muka
na lapide je zavajk viterna ime fameji ukljesa
spoda nje sada blaženi spi mir.
Pol sela je ubošla, mola, mića
je reka otac da mu je manja od puntina
kantajeć je doma tornala
don danas provlja
kako je na babulje škrpetico zgubila
kad se je kljesaru s pupo od kamika folila.
*** Napomena: pjesma pisana na labinjonskoj cakavici koju od 2019. godine krasi Status nematerijalnog kulturnog dobra Republike Hrvatske
Manje poznate riječi; bušić - poljubac; žljuk - gutljaj; pupa - lutka; štrapac - kameniti put; klancić - puteljak; škarpetica - cipelica od platna, rađena ručno; perikol - opasnost; vol - val; konfin - granica; bus - naramak; fragola grojze -vrsta grožđa; gramaca - hrpa kamenja; kova - kamenolom; batoška - borba; škrila - tanka kamena ploča; kamenica - kamena posuda za ulje; tavela - kamena ploča za oblaganje zidova; brentilj - kameni podest ispred bare na kojemu sus e odlčagale brente; lapide - nadgrobni spomenik; ubošla - obišla; puntin - točkica; babulj - oveći kamen; folila- hvalila
Reci
Kad buden portila
na vijac prez konfina
kad tornat
ne buden mogla ni otela
zome svetu reci
i ono ca son od sebe skrila
reci da son bila ženska zrela
va duše velo dete
sedena i mehka
a trja od
kamika presikorskega
reci kako son milo
na tvojen ramene šamuljala
dok drugi so mi dušo mrvili
srce pod nogami drobili
reci da son zjutra ranega
va mladoletak poletela
da me je sunce zobilo,
samo drugeh teplilo
reci kako so moji difeti
bili tvoji konfeti
s pacijenco kombati
kad son se tiho, po tiho
va tvojen srce njezdila
i va njin nošla svoj mir
reci da son se smejala
kad son najviše patila
da son siromahi kapila
sunce i mesecino
samo zote va macići pobirala
reci, semi zome reci
samo nemoj jedinemu reć
kako son i koliko
i radi te
imela.
*** Pjesma pisana na labinjonskoj cakavici
Manje poznate riječi:portila- krenula; konfin- granica; tornat- vratiti se; zome- za mene; sedena - svilena; trja- tvrđa; difeti- mane; pacijenca- strpljenje; kombatit- trpjeti; njezdila- gnijezdila
Kad so držlji plakali kako s kabla
Kratka priča pisana povodom stote obljetnice Labinske republike.
Posvećeno poginulom djedu u velikoj rudarskoj nesreći 1948.godine
***
Iznenadila me odlučnost i riješenost da se suprotstavim bujici emocija koje poput lavine eruptiraju iz mene. Toplinu osjećam i tihi dostojanstveni ponos, naviru škrta sjećanja. U meni živi djetinjstvo, ne dam da ga izbrišu nataložene godine, urezani ožiljci boli i tuge. Iz blaženstva dnevnog boravka, evo me....šutim, prevrćem snove i uspomene. Opet sam djevojčica, na istom mjestu gdje sam sagradila svoj dom. Nekad je tu bio vinograd, nekoliko smokava, nekoliko busena krumpira i kokošinjac. Tu se prepuštam suncu i vremenu, buri i južini, ljepoti proljeća i mrzlini zime. I tu počinje moja priča...Sretno! Neka je to leto mojemu Labinu STO PUTI SRETNO!
Moj grod, moj Labin spoda neba i kampanila, crć na bresciće, mesto kede je saki sakega pozno, mesto kede je i kovarica imela svoj štacijon. Tega dneva, na dvo morca na crće je bilo se drugošlje. Ženske si moga videt obuceneh va kompletini, muški so svoji tarliži pustili na pikarine, obukli so veštidi, štomanji bele, kravato i postoli za blagdan. Va arije se je culo nešto ca se retko more cut. Ja son si bila joko lepa i soma sobun kontenta. Mat mi je kupila novo kotulico i bluzico. Bila son žbrova, tako lepo obucena tekla son po klanciće do cesti pa po preku na crć. Labinska banda je sopla, bandijeri so žventolale, bile so šenjol da je poseban don, Don od kovari ali i moj don rojenja. Na dvo morca son pensala da celi grod fešteđo moj don. Kega god poznatega son imbatila folila son se da so si ti ljudi na crć prišli samo sparacun mene. Na blagdan od kovari, crć je bi krcat, oštariji pune, na crće se je do vecer kasno toncalo. Kovarica je i na blagdan delala svoj poznati đir. Bila je krcata i komića je do crća zgorun po ceste peljala. Kad se je fermala kovari so se raskrcali, zmuceni i trudni. Oni so svojo žarnodo storili, pašćili so doma se prebuć pa so tornivali na crć. Bilo je živo i lepo. Danas mi se paro da so ljudi bili jedon drugemu dobri, cuda so si pomogli, siromašćina je bila vela, ma va slošćine nekako so dnevi sakemu laglje pasivali. Moja šćorica je i jena gramaca, va mićen sele, tu blizu labinskega brescića. Tu son ja, svoje detinjstvo pasala, mola mića, otac je zno reć da son mu manja od puntina. Tu va sele bi je štacijon od kovarice. Po bele ceste, pomalo peljajeć kovarica je po suhen vremene digivala proh i zaprošivala rubidnice ke so rosle blizu cesti. Deca so hi pobirali, onakove pune proha smo jali, slatke so bile, slaje od grojza va brojdah preko puta štacijona. Kad je doš pada bilo je blata do guta, va školo smo pridevali si blatni i mokri.
Na kraje klancića je jena mića kuća. Mića ma složna, siromaha ma poštena. Tu je živelo trinajs dece.Va škerce so susedi znali reć da sused ima parnat dece. Va kove je dela, kovar je bi. Trebalo je to siromašćino nahronit, trebalo je seh va školo slat. Kako i si kovari i on je dela va cojtah, po noće, po vadne, sagdan i na blagdan, ni ime ni nedelji ni blagdana ni feriji. Celo blagoslovljeno leto je dela, samo je za Sveto Borboro zusto doma. Sveta Borbara je bila svetica, ona je kovari cuvala od dižgraciji, za njih se molila. Zgora pustelji, va kamare kede so spoli žena i on vesi je veli kvodar Svete Borbari. Jedon put je bila cela barufa va kuće, žena je otela da se kvodar stavi na šufit da cuva deca. Spoli so kako štrucice, kad je grmelo od stroha so bili si na kupe, a po lete njin je bilo mirakoli teplo, teplina je pražila po mićen kroviće va ke so si imeli njozlo.
- Kladimo kvodar od Svete Borbari poli dece, neka nan hi cuva od sega zla, lepi moji tići provi, molila je muža, zgora naše pustelji bi bilo lepo videt kvodar od nasega zakona. On je nonjo zagrme, culo ga je pol sela.
- Sveta Borbara mora cuvat mene, a deca ćun cuvat ja, si kapila, ko nesi, ne importo, va te kuće će bit po mojen, ja znon zoc, a ti ku ne znoš danas, češ znat jutre zoc ti to gonan. Ona je umuknula, ali ni nje bilo na mod. On je hodi saki don va kovo, on je zno da mora to velo famejo hronit. Va dele, spoda veleh stenah kućo so imeli moja nona i nono. Glodi ni bilo ma vajka je nesto falilo. Nono je va kovo hodi kantajeć. Vajka va kompanije, jedon drugega kamerati so se cekali, s kovarico so se na retko peljali ošto je bila vajka krcata. Raji so portili malo raneje, ćakulali i za politiko kontrastivali, ploći so spominjali, jedon drugemu so se tužili. Tako so brže do kovi rivali. - SRETNO!, so se pozdrovljali i sparili va crnen koridoje, žalica njin je svetila, ona je bila njihov kumponj na dele. Nono je na sebe ime tarliž, na nogah teški kovarski škarponi. Pod zemljo je kopo i krco karbon, kamerati so don i noć kopali i z vagonetami karbon peljali na sunce. Nikad ni reka da mu je teško, ali saki don je savetova svojega sina da nikad ne pride nanka blizu kovi, a va kovo nanka pomislit. Zno je zoc to gona. Zaklje je deštin, a delovac je bi kako provi muškardin. Pokle žarnodi va dopolavore se je noša s kamerati, popi dvo po dvo i zaputi se doma. Nekega bi na prozan štomih vino prevarilo pa je šembrecajeć po bele ceste tuka svoji škarponi do domi kede je cekala fameja. Va kove so bili samo numer, nosili so tabelico z numeron kako špilo. Trdi so njin bili žulji, srce kurojno, jedini od njih ni zno će li doma fameje tornat.Teška je bila fadiga. Dole diboko, pod crno zemljo, kopali so i mucali, deštin delili i sto puti kovo preklinjali. Ta kruh je pretežak, bi je samo za oneh keh je som Boh vibra, ošto je zno da ćo oni fadigo pošteno dones do kraja.
Rašćori se je don, cetrnajsti morca leta Gospodnjega 1948. Trebalo je poć va kovo na žarnodo. Nono je bi malo prehlojen, ma sejno je bi pront za delo. Sako toliko je reka neko besedo kada si moga kapit da ga nesto muci. Kovari so se na ceste sprovljali i cekali kovarico. Lepo hi je bilo videt složneh, rišpetali so se i jedon drugemu pomogli, va brojdah kad je trsi trebalo tendit. Zemlja je trda, za njo kopat si treba bit muškardin. Ko je nesi dobro pozno biš lahko bi priša na kamik ka ti ni do ni kopat ni vanjgat. Kovarica je na štacijone farmala na vreme.
- Sretno! Srećno nan bilo i kuraja! S kovarice so se raskrcali na Pjacale na Poco.
Šli so se prebuć, neso ćakulali, mucali so i kako se je ki obuka je reka, SRETNO! Portili so. Znali so svoj meštjer, znali so svoj dover, znali so da kopat se mora, znali so da karbona ni nikad dosta, a cuvali so se koliko so mogli i rivali.Va grode je ta don pasiva kako i saki drugi.
Sretno! Sretno i kuraja...koliko sreći so si želili, koliko kurojni so bili...crna škurina, ta don na 14. morca leta 1948. je presudila...Škopijo, dižgracija nas je tokala, sireni so rezale saki najmanji bobić Labina, srce so porale i mrvile dušo. Pahalj oskubljeneh vlosi ženske so je va rukah držale, jecale i mucale..
ŠKOPIJO, proguta je mojega noneta i njegovi kamerati. Progutala hi je crna škurina i uski koridoji. Nopeda i nopeda, jenega po jenega so nosili, stotina najdražeh više sunca ne gljedala. Smrt hi je pokosila, deštin je va kove osto, Labin je crno luto obuka. Pokle toliko škopiji, pokle toliko mrtveh na lopate, s crnen karbonon pokrijeni. Ženske so iskale tabelice z numeron od muža, deca so plakali i vriskali, oca dozivali, šperonco so imeli da će njin ćaća prit doma. Pomoći ni bilo, deštin je timbron za sa vremena. Kovari so zakopani, zavajk viterna pokrijeni zemljico labinjosko na kej so se rodili. Kad son mola bila za noneta son pitala. Sada kapin zoc mi ni jedini nic rispondi. Saki je žive svoj dolor, saki je skrivo svoj deštin da deca moro živet. Moja mat ni mogla za kovari mi provljat. Patila je zad ocen, luto zad njin ni nosila, za nono so luto kupili pokle nekoliko don ošto toliko luta va grode ni se moglo kupit. Još jedon put Labin je ranjen, još jedon put zavijen va crno.Nona se je zavajka zavila va luto, takovo son je poznala otkad ja znon zose, tako so je i zakopali. Pred manon se ni nikad žalila. Ta teški crni luto znala je razbit s traveršo škuro blu na bele boleti. Kad je pekla pandešpanjo za svati na sebe je imela belo traveršo s kamufići i belemi merleti.. Kad je traveršo imela joko me je pježala, propio nje je pristala. Vajka me je sobun peljala kamo got je hodila.
- Mola, ruko mi daj,drži se trdo i za moj kamižot, kovarica će pasat, proh s cesti će vajer dignut, kako ćun ja znat kede si ti tako mića. Rodila se je sejnega leta kada i Tito, norcala son je da je Tito bliže bi, tebe bi, nona siguro oženi.
Teška je Labinska šćorica, teški deštini, dižgraciji, siromašćini pasala je saka fameja.
Pod Labinen cuda je koridoji kede je još na tonelodi karbona. Kovari više ni. Siđilani so žuhki deštini. Labin je prepoznon i štimon. Sada kada nas ki pita ki smo i od kuda smo, z orgoljen recemo da smo z Labina, va srce nosimo šćorico orgolja, zaružineli šoht više ni ružin, pituron je i regulon. Labin svetu provlja kovarsko šćorico. Šoht se kampanilu labinskemu do zemlji klanja. Ja ćun sebe za dušo zakantat od Šćulca konto:”...danaska kovari ni, na nebe so si beli anđeli...”
Mojoj priči ovdje ne bi bio kraj da suza ponosa ne klizi obrazima